أول مرة أشتغل سوق سعودي - وعندي عميل عنده بيزنس وانا عوزة أطلع منافسينه
أعمل ايه ؟
خلينا في البداية نفهم ان السوق السعودي دة زيه زي أي سوق - ماهوش بُعبُع يعني
أة الخبرة فيه مطلوبة - ولكن لو ملكش خبرة تقدر تشتغل فيه عادي جدًا
طيب انا في سوق الـ digital سواء سوق سعودي أو مصر أو أيًا كان - بجيب المنافسين منين ؟؟
سهلة إن شاءالله
1- Google search
بمنتهى السهولة واليُسر والسذاجة هتدخل على جوجل تسيرش عادي جدًا
هتكتب مثلًا ((عيادات تجميل في الرياض))
هتطلعلك نتايج كتير - ابدأ إبحث فيها عن اللي قريب منك جغرافيًا
طيب الرياض كبيرة انا عاوز ف منطقة محددة - عاااادي جدًا تكتب ((عيادات تجميل في السليمانية)) هيطلعلك نتايج كتير بردو
ولكن ✋ ... النتايج دي غير مُسّلّم بيها
يعني ايه ؟ يعنى مش هنعتمد على النتيجة دي بس
هناخد النتايج اللي ظهرتلنا ندونها ونركنها على جنب دلوقتي ...
2- Google maps
طالما البيزنس بتاعي له وجود على أرض الواقع (مش بيزنس أونلاين) يبقى ضروري ابدأ بالمنافسين في المنطقة الجغرافية المحيطة بالبيزنس
ادخل على جوجل maps عادي جدًا وهتكتب نفس الحاجة ((عيادات تجميل في السليمانية)) هيطلعلك نتايج كتير
هناخدها ندونها وبردو نركنها على جنب
3- Instagram
طبعًا السوق السعودي ملهمش في Facebook - أساسي عندهم إنستجرام وتيك توك
ولكن السيرش انستجرام هيخدمك فيه أكتر
ادخل اعمل سيرش على نفس الكلمة - بس هنا ممكن تطلع نتايج وممكن لا لان انستجرام مش بيشتغل بنفس الـ Algorithm
طب نعمل ايه ؟
- ممكن نكتبها انجلش
- ممكن نسيرش بالمنطقة فقط
- ممكن نسيرش بنوع البيزنس فقط
هانتعب شوية معلش لكن هنطلع بنتايج - بردو هندونها ونسيبها على جنب
4- وهو Chat GPT أو أي AI tool انت بترتاح فيها
هتدخل تسأله في نفس الحاجة وتطلب منه يجيبلك انستجرام كل عيادة مثلًا
هيديك نتايج - اعملها Save اوركنها على جنب
5- Meta ads library
طالما احنا سوق سعودي يعني شغالين انستجرام
هنتدخل على Meta ads library ونسيرش بالكي وورد اللي احنا عوزينها - وماننساش نحدد الدولة انها السعودية
هنا هيظهرلك كل اللي مشغلين اعلانات دلوقتي أو من فترة قريبة فاتت والاعلان او اسم البيدج فيه الـ Keyword دي
بس خد بالك للأسف النتايج هتظهر في السعودية كلها - هتضطر انت تدور بنفسك مين فيهم من المنطقة اللي بتدرسها
عملت الـ 5 خطوات ؟
طلعت من كل واحدة نتايج وشيلتها على جنب مظبوط ؟؟
هتبدأ تلاقي في أسماء بدأت تتكرر معاك - الأسامي دي غالبًا هتكون هي أهم منافسين في المنطقة
وبكدا اكون جاوبت عالسؤال حسب خبرتي
